1
Unahing iwasan ang mga liwasan.
Pagkat laging naroon siya:

ang matandang nanlilimahid
sa pangaral.

Naroon siya’t iniiwasan
ang lahat liban

sa iyong tingin na agad
niyang sinasalubong

at agad ding itinatakwil.
Na tila may nais ipahiwatig.

Ang paglimot sa sarili.

Na tuwina’y nais mong alamin
bago marating ang dulo

ng liwasan. Ipangako mo,
sadya mong iiwasan

ang matandang walang ngalan.

2
Huwag paghinalaan ang ilog.
bagama’t ilang katawan

ang napabalitang bigla
na lamang lumulutang o di kaya’y

natatagpuang nakasadsad
sa pampang pagpatak

ng madaling-araw.
Tandaang ang agos

ay nakabubura ng alaala,
nakahuhugas ng sala.

Bagkus kumuha ng batong
sinlaki ng kamao.

Asintahin ang di-nakikitang
puso

ng ilog.
Ilipat sa bato ang bigat

ng sariling puso.
Pagdaka’y ipukol ang bato,

pati ang kamao.

3
Hintayin ang patawad
ng ambon.

Abangan sa tuktok
ng gusali ang paghimpil

ng mga ibon.
Sabayan silang sumilong

sa sandali ng pagtakwil
ng paglipad.

Montage Vol. 10 • December 2006

LEAVE A REPLY

This site uses Akismet to reduce spam. Learn how your comment data is processed.