“RACE of veterans—race of victors!
Race of the soil, ready for conflict—race of the conquering march!
(No more credulity’s race, abiding-temper’d race,)
Race henceforth owning no law but the law of itself,
Race of passion and the storm.”
Race of Veterans, Walt Whitman
Tila isang “all bark, no bite” ang pagpapalitan ng agresibong mga pahayag ng pinuno ng North Korea na si Kim Jong Un at ng pangulo ng Estados Unidos (US) na si Donald Trump. Gayumpaman, nakababahala mayroong ganitong sagutan sa pagitan ng dalawang lider ng mga bansang may nuclear weapons.
Nagsimula ito nang magdeklara ng unanimous vote ang United Nations Security Council sa pagpataw ng parusa sa North Korea matapos nitong subukang paliparin ang dalawang intercontinental ballistic missiles patungong US noong nakaraang buwan. Sinundan ito ng paglabas ng isang US intelligence report na nagsasabing naging matagumpay ang North Korea sa paggawa ng miniaturized nuclear warheads para sa mga missiles.
Sinagot ni Trump ang balita. Tutugunan daw ng US ang North Korea gamit ang “apoy at galit, na hindi pa kailanman nasisilayan ng mundo” (with fire and fury, the likes of which the world has never seen before).
Ipinagkibitbalikat ni Kim at nagbanta pa siya na sa kalagitnaan ng Agosto bobombahin ng North Korea ang Guam, isang teritoryo ng US sa pagitan ng Korean Peninsula at South China Sea. Malapit nang matapos ang buwan at mabuting walang nagyayaring pambobomba ng mga bansa.
Maaaring binawi ni Kim ang banta sa ngayon ngunit tila isang nagbabadyang bagyo ang posibilidad ng isang giyera sa pagitan ng North Korea at US na maaaring mangyari ayon sa bugso ng damdamin ng dalawang pinuno.
Hindi imposible para sa mundong mag-antabay sa nasabing gyera sapagkat tila kulog at kidlat sina Kim at Trump sa ingay at gulat na dala ng kanilang mga banta.
Maging epektibo sana sa pagpigil ng nabubuong delubyo ang mga gobyerno ng North Korea at US na dulot ng mga disaster-prone nitong mga pinuno.
Nakasalalay ang mundo sa epektibong diplomasya upang maiwasan ang pagdami ng mga pamilyang lumilikas mula sa mga napinsalang tahanan, sa pagdanak ng dugo at sa paglaganap ng kaguluhan at pagkamuhi.
