IGINAWAD ang prestihiyosong Parangal Hagbong sa mamamahayag na si Nestor Cuartero sa Gabi ng Parangal ng ika-41 Gawad Ustetika ngayong Biyernes, Marso 27.
Iginawad ng Varsitarian ang Parangal Hagbong mula pa noong 1997 bilang lifetime achievement award sa isang Tomasinong may natatanging ambag sa sining at panitikan.
Sa taong ito, kinilala si Cuartero para sa “kanyang natatanging kontribusyon sa larangan ng peryodismo, dedikasyon sa pagsasabi ng katotohanan bilang manunulat at patnugot, at mahalagang papel sa paghubog sa susunod na henerasyon ng mga mamamahayag.”
Sa kanyang talumpati, binalikan ni Cuartero ang kanyang mga karanasan bilang mag-aaral sa Unibersidad at manunulat ng Varsitarian noong panahon ng batas militar.
“For these and so much more, I thank the Faculty of Arts and Letters, our good old Varsitarian—the one great love of my youth… for having planted, nourished and nurtured me on the right track all along,” aniya.
Nagsilbi si Cuartero bilang patnugot ng seksiyong Mulinyo (Circle) at katuwang na patnugot ng Varsitarian noong kaniyang huling taon sa kolehiyo sa ilalim ng kursong journalism.
Aniya, ang kanyang karanasan bilang patnugot ang humubog sa kanyang landas sa entertainment journalism.
Si Cuartero ay isang premyadong mamamahayag na nakapaglimbag ng mga librong “At Large, At Leisure” (2008), “PH Movie Confidential” (2022), at “Easy Listening” (2023). Kasalukuyan siyang miyembro ng lupon ng Movie and Television Review and Classification Board at kolumnista sa Manila Bulletin at The Business Monitor.
Nagturo rin siya sa Unibersidad sa ilalim ng Department of Communication and Media Studies sa loob ng dalawang dekada, mula 1998 hanggang 2018.
Noong 2024, ginawaran siya ng The Outstanding Thomasian Alumni (TOTAL) Award for Media and Entertainment.
Pamamahayag sa ilalim ng Martial Law
Sa ilalim ng diktadurang Marcos, tinutulan ng mga magulang ni Cuartero ang kanyang pagkuha ng kursong journalism dahil sa panganib na kaakibat nito.
Dahil sa kanyang hilig sa media, pinili niyang magsulat tungkol sa sining at entertainment, na mas ligtas kaysa sa pagtalakay sa pulitika noong panahong iyon.
“I went for the arts, specifically, the movies, where my writing felt safe, cocooned, less controversial. This way, I thought my parents would feel secure with their peace of mind in the countryside,” aniya sa kaniyang talumpati.
Nagpasalamat din siya sa mga gurong humubog sa kanya, kabilang sina Felix Bautista, Ophelia Alcantara-Dimalanta, Celso Al Carunungan, at Eugenia Apostol.
Binigyang-diin niya ang papel ng Unibersidad sa paghubog ng kanyang pananaw bilang manunulat.
“Side by side, the Varsitarian, my Arts and Letters education, laid the foundation for a firm, holistic view of the world and of myself, putting me on solid ground in a Christian, humanistic perspective, one steeped in prayer and thanksgiving.”
Sa pagtatapos ng kanyang talumpati, iginiit ni Cuartero ang halaga ng entertainment journalism bilang seryosong larangan ng pamamahayag.
“Journalists pounding the beat are encouraged to develop seriousness of purpose, imbued with a historical perspective, a sense of responsibility that can be achieved without robbing the stories of their natural grasp, look and feel of the beautiful, the intriguing, the vibrant, and of course, the entertaining,” dagdag niya.
Kabilang sa mga naunang ginawaran ng Parangal Hagbong ang mga Pambansang Alagad ng Sining tulad nina Nick Joaquin, Daisy Hontiveros Avellana, Rolando Tinio, J. Elizalde Navarro, F. Sionil José, Cirilo Bautista, at Bienvenido Lumbera.
Iginawad ang parangal kay Cuartero sa lobby ng Blessed Buenaventura Garcia Paredes, O.P. Building, kalakip ang inukit na tropeyong likha ni Romeo Forbes na sumisimbolo sa balanse.
