AKING Ina,

Sa isandaa’t limampung taludtod

Ng alay kong dasal,

Dinggin mo ang hikbi

Ng aking kaloobang

Sa sulirani’y naghihingalo

Gaya ng upos

Ng isang kandila.

Sa bawat paghigpit

Ng aking kalyadong daliri

Sa kuwintas kong

Krus at butil,

Dama ko ang pag-asang

May bubulong at tutugon

Sa paulit-ulit kong daing.

Isa akong bulag na ‘di makakita,

At manhid na hindi makadama

Sa anyo mong itinatangi’t

Kanilang dinadakila.

Kung sakaling ikaw nga’y

Nakikinig sa akin,

Masilayan ko na sana ang liwanag

Sa muli kong pagsilang

Mula sa iyong sinapupunan,

O aking Ina.

Lee V. Villanueva

READ
Deadline

LEAVE A REPLY

This site uses Akismet to reduce spam. Learn how your comment data is processed.