UMALMA ang iba’t ibang student organizations sa bagong panuntunan ng Office for Student Affairs (OSA) na nagpapatupad ng mas mahigpit na pagbabantay sa paggamit sa social media accounts.
Ayon sa memorandum ng OSA na inilabas nitong ika-8 ng Agosto, kailangang magsumite ang mga student organization ng Permission to Post (PTP) sa kanilang direktor o dekano, tagapayo, Student Welfare and Development coordinator at sa OSA bago silang maglabas ng social media posts gaya ng publicity materials, announcements at official statements.
Kahit na nilinaw ng OSA na hindi nangangailangan ng tugon o pag-apruba galing sa OSA ang pag-post sa social media, inulan pa rin ito ng batikos galing sa mga lider ng iba’t-ibang student organizations.
Giit ng public relations officer ng Central Student Council na si Jeric Sun, sayang sa oras ang bagong panuntunan ng OSA.
“[T]he newly released guidelines from OSA that require approval forms are understandable, however, they are difficult and time-consuming,” ani Sun sa isang panayam sa Varsitarian.
Dagdag pa ni Sun, hindi lamang sa mga isyu sa loob ng Unibersidad nagbibigay ng pananaw ang iba’t-ibang organisasyon, kundi pati na rin sa mga isyu sa bansa.
“Student leaders stand their ground and voice out concerns that are not limited to students, but the country as well. In these cases, the students as well as the administrators do not always see eye to eye,” wika ni Sun.
Ayon naman sa TomasinoWeb, isang digital media organization, lubhang makakaapekto ang mga bagong panuntunan sa kanilang operasyon.
“The existence and the mere requirement of accomplishing that form is equivalent to a campus press begging its administration if they are allowed to tell the truth and if they are even allowed to express themselves,” wika ni Isaac sa isang panayam sa Varsitarian.
Naunang kinondena ng National Union of Students of the Philippines (NUSP) ang mga bagong panuntunan.
Giit ng pangulo ng NUSP na si Raoul Manuel, ito ay “online censorship” at maaaring gamitin upang patahimikin ang mga estudyante.
Pinuna rin ito ng pangulo ng UST Journalism Society na si Lorenzo Arroyo, na nagsabing maaari itong makaapekto sa malayang pagpapahayag ng mga organisasyon.
“There is absolutely no need for PTP forms. I feel that memos like this can abridge the freedom of expression and speech of organizations,” ani Arroyo.
Giniit pa ni Arroyo, ang bawat organisasyon na opisyal na kinikilala ng Unibersidad ay mayroong dokumentong sumusumpa sa responsableng paggamit ng mga social media.
“For the record, OSA’s annual organization recognition requirements contain a document where organizations swear and commit to responsible social media use. I firmly believe recognized student organizations have followed this religiously,” wika ni Arroyo.
Dismayado rin ang presidente ng Hiraya na si Judy Clariz sa mga bagong panuntunan.
“I think it is unnecessary and adds workload to publicity and content creators of organizations [..] It disrupts the flow of information between the organization and the student body, especially that there are posts that require urgency and immediate action,” ani Clariz sa isang panayam.
Nakasaad sa memorandum ng OSA na ang mga organisasyon ay magkakaroon lamang ng isang social media account sa Facebook, Instagram at Twitter, na limitado ang access sa tatlong opisyal ng organisasyon at sa tagapayo nito.
Maaaring i-reprimand ang mga opisyal o isuspinde ang operasyon, pribilehiyo o accreditation ng organisasyon alinsunod sa UST Student Handbook.
Sinubukang hingin ng Varsitarian ang panig ng OSA ngunit wala pang tugon ang tanggapan.
