ISANG asian studies freshman mula sa Faculty of Arts and Letters ang bagong courtside reporter ng UST sa UAAP Season 81.
Papalitan ng 18-anyos na si Makyla Chavez si Tonie Moreno na naging tagapag-ulat ng mga laro ng Tigers noong nakaraang season.
“Courtside reporting is more than just facing the camera or the crowd. It’s a privilege that holds so much responsibilities,” wika ni Chavez sa isang panayam sa Varsitarian.
Para kay Chavez, malaking tulong ang pagiging miyembro ng UST Tiger TV, ang opisiyal na television network ng Unibersidad, dahil dito nahasa ang kaniyang hosting skills. Kasalukuyang tagapag-ulat din siya sa “The Frontrunners,” ang opisiyal na sports show ng nasabing organisasiyon.
“I feel more than a connection by just holding a microphone and being in front the crowd,” ani Chavez.
Napili si Chavez matapos ang isang buwang screening process kasama ang 200 na aplikante noong Hulyo.
Agosto 15 nang malaman niya na isa siya sa limang bagong courtside reporters ngayong season kasama sina Corinne Catibayan (Adamson University), Aiyana Perlas (De La Salle University) at Sam Corrales (Univeristy of the Philippines).
“I’m excited and at the same time tensed because I want to meet or even go beyond the expectations of the Thomasian community,” wika ng bagong courtside reporter.
Muling magbabalik naman para sa ikalawang pagkakataon sina Migs Gomez (University of the East), Sydney Crespo (Far Eastern University) at Miguel Dypiangco (National University).
Masisilayan si Chavez sa unang laro ng Growling Tigers kontra NU Bulldogs sa Setyembre 8, Sabado, ika-4 ng hapon, sa Mall of Asia Arena.
