5 Agosto 2014, 6:52 p.m. – PUMANGALAWA muli ang UST sa listahan ng top-performing schools sa nakalipas na Nutritionist-Dietitian licensure examinations noong Hulyo, ngunit bahagyang bumaba ang marka nito.
Ayon sa datos mula sa Professional Regulation Commission (PRC), nagtala ang Unibersidad ng 90.53-percent passing rate, kung saan 86 na Tomasino mula sa 95 na kumuha ng pagsusulit ang pumasa.
Bahagyang mas mababa ito sa 95.12 percent o 78 na pumasa mula sa 82 kumuha noong nakaraang taon.
Walang Tomasino ang nakapasok sa listahan ng sampung nanguna sa pagsusulit.
Nanatili pa ring top-performing school ang University of the Philippines-Los Baños na nagtala ng 100-percent passing rate matapos pumasa lahat ng 72 estudyante nito.
Kailangan ng 80 percent o mas mataas at 50 o mahigit na estudyanteng kumuha ng pagsusulit upang ma-ideklarang top performing school ng PRC.
Bahagyang bumaba ang national passing rate sa 63.59 percent o 634 na pumasa mula sa 997 na kumuha ng pagsusulit, kumpara sa 64.36 percent noong nakaraang taon. Roberto A. Vergara, Jr.