BINATIKOS ng UST College of Education Student Council nitong Linggo ang kumalat na video serye na pinamagatang “Online Class.”
Ayon sa konseho, pambabastos sa mga guro ang serye ng VinCentiments, na mistulang naglalarawan sa mga guro bilang iresponsable at walang malasakit sa mga estudyante.
Sa video, isang babaeng mag-aaral ang mapapanood na nagmumura matapos ilang beses maantala sa pagre-report tungkol kay Jose Rizal.
Bukod sa problema sa network connection, inutusan siya ng kanyang ina na bumili sa tindahan, ilang beses umiyak ang sanggol na kapatid, kumahol ang aso, at nag-videoke pa ang kapitbahay.
“The 9-minute video clearly invalidates the teaching profession and the dignity of the educators,” wika ng konseho.
Dagdag pa nila, hindi ipinakita ng palabas ang patuloy na pagsisikap ng sektor ng edukasyon para makamit ang pangkalahatang edukasyon.
Sabi ng konseho, dapat ibaling ang atensiyon sa gobyerno upang mabigyan ng tulong ang mga hikahos ng guro, estudyante at magulang.
“We must exhaust all our efforts in strengthening our demands to the government for the general interest of our country,” wika nila.
Ang seryeng “Online Class” ng VinCentiments ay napanood ng mahigit limang milyong beses sa Facebook, ngunit umani ng batikos mula sa netizens, kabilang na ang mga guro.
