Tag: Jonelle V. Marcos

HINDI malululan ng maliit na bangka

ang bigat ng damdamin ng paglisan

nang walang paalam, unawaan at kapatawaran

Hindi makapaglalayag nang mapayapa

ang kaluluwang naka-angkla ang alaala

sa pagluluksa at pagluha

ng mga naiwan

Hindi mapipigilan ng hinubog na luwad

ang pagpupumiglas ng katawan

na muling lumaya, bumalik,

at bumaba mula sa bangka

Ngunit walang pakialam ang nasa likuran

na patuloy sa pagsagwan

sa lawa ng mga luha

ng mga naroon na sa Kaluwalhatian

BILANG tanda ng pagpapahalaga sa wika, nagtatag ang mga Tomasino ng isang samahan para sa pagsusulong at pagpapayabong nito.

Noong 1947, pormal na naitatag at kinilala ng Unibersidad ang “Diwa ng Kabataan” bilang isang organisasyong pangwika na naglalayong paigtingin ang damdaming makabayan ng mga Tomasino sa pamamagitan ng pagpapayaman sa wika.

Bunsod ito ng pangangailangang muling iangat ang pagtingin ng mga Filipino sa sariling wika matapos ang kaguluhan ng nakaraang Ikalawang Digmaang Pandaigdig na nagdala ng iba’t ibang wikang banyaga sa bansa.