ISANG propesor mula sa Unibersidad ang nagwagi sa Gawad Surian-Gantimpalang Collantes 2001 noong Agosto 17.
Ginawaran si Roberto Ampil, isang propesor ng Filipino mula sa Faculty of Arts and Letters, ng ikatlong gantimpala sa kategoryang sanaysay sa pamamagitan ng kanyang akda, “Ang Wikang Filipino sa Paaralan at ang Hinaharap Nito sa Daigdig ng Malawakang Pagbabago.”
Isang taunang patimpalak sa larangan ng pagsulat ang Gawad Surian at iginagawad sa kategoryang sanaysay ang Gantimpalang Collantes.
Tinalakay ni Ampil sa inilahok niyang sanaysay ang mga problema na kinakaharap ng mga guro sa paggamit ng wikang Filipino sa kanilang pagtuturo.
Ayon kay Ampil, isa sa mga suliranin ang ating kasaysayan. Dahil sa pagsakop sa atin ng mga dayuhan, labis na naapektuhan ang kultura ng mga Pilipino. Idinagdag din niya na nagkaroon ang mga Pilipino ng “inferiority complex”.
Aniya, naging tradisyon na ng mga Pilipino ang paggamit ng wikang banyaga upang malagay sila sa mas mataas na estado sa lipunan.
“Ayon sa pananaliksik, maraming Pilipino ang marunong mag-Ingles. Pero hindi edukado. Magaling silang magsalita ng Ingles pero walang laman,” wika ni Ampil.
Ang paggamit ng wikang Filipino sa pang-akademikong pagtuturo ang isa pang problema na kinakaharap ng wikang Filipino.
“Nagkakaroon ng problema (sa pagtuturo), tulad ng sa komersiyo. Halimbawa ang “freezing asset”, paano mo ita-Tagalog iyan? Mahahaluhan lamang ng malisya ang pagtuturo ng akademikong iyon,” dagdag pa ni Ampil.
Sinabi rin ni Ampil na kung manghihiram ang mga Pilipino ng mga wikang dayuhan, mas makabubuting hiramin ito ng buo kaysa gumawa pa ito ng mga salitang kasingkahulugan ng kanyang hiniram. Billy Joe I. Allardo
