Pelikula ang isa sa mga paraan upang mailahad ang pang-araw-araw na karanasan ng mga Pilipino sa kani-kaniyang lugar at panahon. Kaya naman sa ikalawang taon ng Pista ng Pelikulang Filipino, ipinalabas ang walong pelikula upang payabungin ang estetika, kultura at halaga ng lokal na pelikula. Pinamunuan ito ng Film Development Council of the Philippines, katuwang ang mga sinehan sa buong Filipinas.
Upang maibahagi ang mga nilalaman at pananaw na nakapaloob sa mga pelikulang ito, sinikap ng Varsitarian na suriin ang mga tampok na pelikula noong ika-15 hanggang ika-21 ng Agosto.
Madilim Ang Gabi
Nakaaantig ng damdamin ang pelikulang “Madilim Ang Gabi” ni Adolfo Alix, Jr., tungkol sa isang pamilyang nais magbagong-buhay mula sa paggamit at pagtulak ng ilegal na droga.
Maririnig sa simula ang boses ng pagbabanta ng Pangulong Rodrigo Duterte tungkol sa ilegal na droga, na lubos na ikinatakot ng mag-asawa na sina Sara (Gina Alajar) at Lando (Philip Salvador).
Nang magsimula sila sa pagbabagong buhay, nawalang parang bula ang kanilang anak. Dahil dito, napilitan silang pumunta sa bahay ni Kidlat, ang dati nilang amo sa pagbebenta ng ilegal na droga, upang makiusap na ibalik ang kanilang anak.
Makikita ang pinag-ugatan ng mga pangyayari nang dinala sila sa isang kulungan na hawig sa ibinalitang “secret jail” ng Manila Police District. Dito ipinaalam sa kanila ng mga pulis na konektado sa pagkawala ng anak si Kidlat.
May kurot din sa damdamin ang daloy ng kuwento sapagkat ipinakita ang pagmamahal ng magulang na gagawin ang lahat upang mailigtas ang kanilang anak.
Tunay na napapanahon ang mga eksena sa pelikulang ito lalo na noong makita ng mag-asawa na patay at nakahandusay sa tapat ng kanilang bahay ang kanilang anak habang nakabalot sa packaging tape at may plaka na, “Huwag tularan, pusher ako.”
Ipinakita rin ang pagkakaroon ng mapanganib na buhay dahil sa pagiging sangkot sa ilegal na droga, nang barilin ang mag-asawa sa tapat ng kanilang bahay sa gabi ng burol ng kanilang anak.
Bagaman binigyang-diin na kathang-isip lamang ang kuwento, kitang-kita ang pagkakahambing ng mga pangyayari sa mga balita tungkol sa extrajudicial killings sa bansa.
Bakwit Boys
Tinalakay ni Jason Paul Laxamana sa “Bakwit Boys” ang paglalakbay ng magkakapatid na sina Elias (Vance Larena), Philip (Nikko Natividad), Joey (Ryle Santiago) at Sonny (Mackie Empuerto) sa mundo ng musika upang makapag-ipon ng pera para sa kanilang tahanan na nasalanta ng bagyo sa Isabela.
Kapansin-pansin ang pagiging simple ng kuwento ngunit binigyang-diin ang pagpapahalaga ng magkakapatid sa pamilya, nang mapilitan silang lumikas papunta sa kanilang Lolo Cesar (Nanding Josef) sa Pampanga.
Bagaman tinulungan ni Rose (Devon Seron) ang magkakapatid upang sumikat ang kanilang kanta, natuklasan ni Philip na ang senador na sangkot sa pambubulsa ng pera, na para sana sa mga nasalanta ng bagyo sa Isabela, ay ang ama ni Rose. Hindi man lubusang binigyang-pansin sa pelikula ang katiwalian, ipinakita rito na ang karanyaang tinamasa ni Rose ay mula sa kaban ng bayan na ninakaw ng kaniyang ama.
Sa katuparan ng pangarap ng magkakapatid, itinampok sa pagtatapos ng pelikula ang mabuting aral ng pagbibigay ng kapatawaran sa mga taong tunay na nagsisi at gumawa ng mga hakbang upang makabawi sa mga taong naperhuwisyo.
