Kagabi’y sumuko ako sa pag-irog.

Nagtatakbuhan ang mga binatilyo

Na hinahabol ng tabak at balisong,

Magkahawak-kamay tayo.

Sinisinta ang kumikislap na liwanag

Ng mga bituing nakasilip sa langit,

Nilalasap ang ating katahimikan

Matapos malagpasan ang hinihintay

Na pag-uusig sa pintig ng damdamin,

Sa tapang ng dibdib at pananalig.

Nabalisa ang aking buong pagkatao,

Napahawak nang husto sa kamay mo.

Sa kanto, nakatakda nang lumipad

Ang mga ipinukol na kahoy at bato,

Ang ‘di masawatang pagbigkas

Ng malulutong na mura at sumpa

Ng sindak, ng ganti, ng kamatayan.

Nahaharap tayo sa gulo at galaw

Ng isang kakatwang munting digmaan

Ay ganap na ganap ang aking pagsuko—

Hindi pagkatalo ang nais ipabatid

Kung hindi lubos na pagpapaubaya.

Bigla-bigla’y humupa lahat ng galit,

Nagbalik ang kalye sa angking tahimik.

*Dating katuwang na patnugot ng Varsitarian si Sanchez. Tapos siya ng AB Journalism sa Faculty of Arts and Letters at MFA in Creative Writing sa De La Salle University.  Dalawang ulit na siyang itinanghal na Makata ng Taon (2006 at 2009) ng Komisyon sa Wikang Filipino.

READ
Lubos na pagmamahal

LEAVE A REPLY

This site uses Akismet to reduce spam. Learn how your comment data is processed.