ISANG panukalang batas ang isinusulong ngayon upang pag-igihin ang komunikasyon sa bansa para sa mga pipi at bingi. Ito ang House Bill no. 450 para sa ika-16 na kongreso ng Alliance of Concerned Teachers Party-List (ACT-Teachers) na naglalayong gawing opisyal na lengguwahe ng gobyerno ang Filipino Sign Language (FSL) sa lahat ng transaksiyon sa mga institusyon na may partisipasyon ang pipi at bingi.
Ayon kay Maneeka Sarza, legislative staff ng Act-Teachers, mahalagang maisabatas ang panukala dahil makatutulong ito upang mapabuti ang kalagayan ng mga pipi at bingi.
“Kapag ito ay napagtibay, magkakaroon ang hakbang na ito ng suportang pinansyal at serbisyo mula sa gobyerno at iba’t ibang institusyon,” ani Sarza.
Aniya, nilalayon ng panukalang itong masolusyunan ang problema sa edukasyon ng mga mag-aaral na pipi at bingi sa pamamagitan ng pagbibigay sa kanila ng atensiyon sa mga paaralan.
“Kung maisasatupad ang House Bill no. 450 lalo na sa mga pampublikong paaralan, paniguradong mas lalaki ang bilang pipi at bingi na nais makapag-aral.”
Sinabi ni Sarza na malaking sagabal ang Licensure Examination for Teachers (LET) para sa mga pipi at binging nais magturo ng sign language dahil kaunti lamang ang pumapasa rito.
“Kailangang pag-aralan ang sistema. Baka maaaring mabigyan ng exemption ang mga gurong pipi at bingi sa pagkuha ng LET nang sa gayon, magkaroon sila ng karapatan na makapagturo sa mga pampublikong paaralan kahit na walang lisensya,” aniya. “Maaari ding ikonsidera ang pagkakaroon ng sign language interpreters na tutulong sa mga kumukuha ng pagsusulit.”
Kumbinsido naman si Mackie Calbay, Deaf Advocacy Coordinator ng School of Deaf Education and Applied Studies ng De La Salle–College of St. Benilde, na malaking pagbabago ang maidudulot sa buhay ng mga pipi at bingi ang pagpapalaganap ng FSL. Ang pagtuturo ng FSL sa mga paaralan ay magbubukas ng oportunidad para sa mga pipi at bingi sa bansa.
“It would provide greater access to information and everything will be clearer and more understandable,” ani Calbay.
Binigyang diin niya na malaki ang maitutulong ng mga taong nakaririnig sa pagpapaigting ng komunikasyon hindi lamang sa pagitan ng mga pipi at bingi kung hindi pati na rin sa mga nakaririnig.
“If the hearing people will learn FSL, they will serve as the bridge to a greater society and to the rest of the world. It will make things better,” aniya.
Isang militanteng samahan na naglalayong pangalagaan ang kapakanan ng mga guro sa bansa ang Act-Teachers.
Hango sa kultura
Ang sign language, ayon kay Calbay, ay tumutukoy sa paraan ng komunikasyon ng mga Filipinong pipi at bingi gamit ang wikang Filipino.
“FSL is the true and natural unique visual language trying to make context and is used as a sort of an identification for deaf Filipinos,” ani Calbay sa Varsitarian.
Nilinaw niya na bagaman ang FSL ay isang uri rin ng komunikasyon ay kaiba pa rin ito sa panitikang nakalathala sapagkat ito ay base sa mga simbolo.
“In terms of grammatical structure and syntax, FSL has its own unique characteristics which are very different from the spoken language,” aniya. “It is not a written system and it is a separate structure that is based on sign system.”
Ang FSL ay nakatutulong na gawing mas malinaw ang pakikipagtalastasan at ng mga bingi o Filipino deaf hindi lamang sa kapuwa nila bingi kung hindi pati na rin sa mga taong may normal na pandinig.
“These signs help the deaf people understand and communicate with each other.”
Sinabi ni Calbay na ang sign language ay nahuhubog ayon sa pinagmulan nitong kultura. Kaya naman hindi nakapagtataka na mayroong iba’t ibang uri ng sign language sa bawat rehiyon ng bansa.
“The signs are created by the deaf community as their expression by means of heritage and affiliation to culture.”
Nagbigay ng mga halimbawa si Calbay ng ilan sa mga mekanismo na ginagamit kung paano ginagamit ang FSL. Ilan sa mga ito ay ang hand shapes, palm orientation, movement, location at non-manual systems.
Ang non-manual systems—tulad ng facial expressions—ay tumutukoy sa mga senyales na may kakayahang magpahayag ng emosyon nang hindi nangangailangan ng pagkumpas ng kamay. Altir Christian D. Bonganay
