‘Troya’ at ‘Eksena,’ inilunsad

0
1796
Pascual and delos Reyes

SA KABILA ng ingay at kaguluhan sa Maynila, mayroong mga bahagi ang lungsod na naglalaman ng mga kuwentong hindi pa naririnig ng karamihan.

Sinilip ni Chuckberry Pascual, dalubguro ng panitikan sa Fakultad ng Sining at Panitik, ang ilan dito at ibinahagi sa kaniyang aklat na pinamagatang “Pagpasok sa Eksena: Ang Sinehan sa Panitikan at Pag-aaral sa Ilang Piling Sinehan sa Recto” (UP Press).

Inilatag dito ni Pascual ang kaniyang pagsusuri sa ilang mga sinehan sa Recto na nagsisilbing sulok at espasiyo para sa mga bakla at sa kanilang kasiyahan na malayo sa panghuhusga ng lipunan.

“Pumupunta ako roon at nagkukunwaring isa sa kanila. Pumapasok ako para manood din ng sine, tapos kakausapin ko sila. Nandoon ‘yung danger na baka bugbugin ka,” ani Pascual sa paglulunsad ng kaniyang aklat sa Tanghalang Teresita Quirino noong ika-28 ng Pebrero.

“Nasa labas pa lang ako, tatanungin na ako, ‘Alam n’yo ba kung anong nangyayari diyan?’ Titingnan ka nila nang masama tapos iisipin nila, ‘Media ka ba?’” dagdag pa niya.

Sa Facebook status ni Jerry Gracio, kinatawan ng wika sa Samar-Leyte para sa Komisyon sa Wikang Filipino, noong ika-19 ng Pebrero, tinawag niyang “espasiyong bading” o “espasiyo ng mga bading” ang mga piling sinehan na nabanggit sa aklat ni Pascual.

“Sa pag-aaral ni Pascual sa panitikan hinggil sa mga sinehang ito, at sa mismong sinehan—sa mga tao na nanonood, sa mga kolboy (call boy) na ginagawa itong tambayan—sa mga parokyano—nagiging closet ang mga sinehang ito na nagtatago at itinatago ang mga bakla sa madidilim na sulok at espasyo ng lungsod, sa kabila ng pangangalandakan na welcoming ang ating lipunan sa mismong mga bakla,” paglalahad niya.

Samantala, kasabay namang inilunsad ang “Troya: 12 Kuwento” (Visprint) ni Joselito de los Reyes, dalubguro ng malikhaing pagsulat sa Unibersidad, na naglalaman ng mga kuwentong tumatalakay sa ilang mga suliraning panlipunan maging sa mga personal na paksa.

READ: Hagikhik sa masalimuot na kasalukuyan: Pagsilip sa troya ni Joselito delos Reyes

“[Sa pagsusulat ng Troya], ang dami kong pinaghugutan na totoong lugar na may totoong pangyayari,” ani de los Reyes sa malayang talakayan.

Dagdag pa niya, nagsilbing hamon sa kaniyang pagsusulat ang pagtago sa identidad ng mga tauhan na malapit sa mga tunay na pangyayari.

“Tinatawag ko silang kuwento kasi ang lapit-lapit lang nila sa katotohanan ng nangyari,” aniya.

Bahagi ng UST Authors Series ng Center for Creative Writing and Literary Studies ang paglulunsad.

LEAVE A REPLY

This site uses Akismet to reduce spam. Learn how your comment data is processed.