KUMAKAPAL na ang mga panukalang batas na inihain sa Kongreso para pigilin ang paglaki ng populasyon ng bansa, at isa rito ang two-children policy bill. Subalit mga eksperto mismo ang nagsasabi na ang mga ito ay hindi solusyon, sa halip, dagdag pa sa problema.

Upang magkaroon ng linaw ang isyu, isinagawa ng UST at ng American Studies Association of the Philippines ang talakayang “Facing the Population Crisis” na ginanap sa audio-visual room ng Faculty of Arts and Letters noong ika-28 ng Hulyo.

“Lumalabag ang two-children policy bill at five-year birth moratorium sa karapatan ng mga magulang na malayang magdesisyon kung ilang anak ang gusto nilang palakihin,” ani Fr. Tamerlane Lana, O.P., rektor ng Unibersidad, sa Varsitarian. “Kung maipatupad man ang mga ito, ano ang mga paraan na gagawin? Andiyan ang artificial birth control at abortion na hindi rin maisasakatuparan sa ating bansa kung saan malakas ang respeto sa dignidad ng tao.”

Dalawang pagtalakay ang tinampok sa nasabing symposium—ang takbo ng demograpiya ng Pilipinas at ang epektong medikal ng mga kontraseptibong ipalalaganap ng gobyerno.

“Huwag nating tingnan na isyung moral o relihiyoso ang di pagsang-ayon sa mga depopulation program. May mga siyentipikong datos batay sa United Nations (UN) at 50 taong karanasan ng ibang mga bansa na magpapatunay na talagang mali ito,” ayon kay Prof. Rosa Linda Valenzona ng UP School of Economics, dating undersecretary ng Department of Social Welfare and Development.

“Sa perspektibong Malthusian, tinitingnan na pabigat ang dami ng anak. Hindi nakikita ang long-run implications ng fertility decline gaya ng kakulangan sa mga batang manggagawa,” ani Valenzona.

READ
Francisco Doplon's logo rhythm

Pinaliwanag ni Valenzona na dahil sa progreso ng siyensya, mas humahaba ang life expectancy ng tao at ang dami ng matatanda. Kasama sa epekto ng population control ang kaunting bilang ng pinapanganak at batang populasyon na nasa working force na sasalo sa mga hindi na makapagtrabaho. At dahil kaunti ang nasa labor force, babagsak ang market at ang social security system. Ito ang problema ngayon ng mga taga-Kanluran kaya’t pinayagan na ng ibang bansa ang euthanasia para sa matatanda.

“Sa Pilipinas, tanging ang pagkaunti ng mga nagiging anak ang naidulot ng 30 taon na pagkontrol ng populasyon nito,” ani Valenzona. “Tama lang ang bahagdan ng populasyon ng bansa at pabagsak na ang trend ng average child per woman. Kung hihigpitan pa ang patakarang pampopulasyon tulad ng two-child policy, pagsapit ng taong 2020, magkakaroon ng malaking kakulangan sa puwersa ng mga manggagawa,” ani Valenzona.

Samantala, sinabi ni Dr. Edna Monzon, Tomasinong scholar ng French Government sa Hospital Cardiovasculaire de Lyon at pangalawang pangulo ng Bioethics Society of the Philippines, na maraming masamang epekto ang mga kontraseptibong planong paglaanan ng P100 million budget ng Pilipinas, na hindi sinasabi sa publiko.

“Normal at natural kasi sa katawan ang maging fertile, hindi ito dapat pinipigilan na parang salot. Nagdudulot ang mga artipisyal na kontraseptibo ng enviromental imbalance sa reproductive system, aniya.”

Inirekomenda ni Monzon ang natural family planning gaya ng Billings method na walang side-effects at napabubuti umano ang relasyon ng mag-asawa dahil kinakailangan ang kooperasyon at pantay na responsibilidad.

Nagtataka ang ilang mga sektor kung bakit hindi magtugma ang mga datos na binibigay ng UN sa patakarang pampopulasyon ng ilang ahensya nito. Hindi rin tugma ang datos ng UN at ng Philippine Population Comission (PopCom).

READ
Banishing self-pity

“Sinasabi kasi ng PopCom na ang annual population growth rate ng Pilipinas ay 2.36 porsyento, pero noon pa ito. Ang population growth rate natin ngayon ay 1.61 porsyento na lamang, ayon sa pinakabagong datos ng UN,” ayon kay Rosie Luistro, pangulo ng Alliance for the Family Foundation. Isiniwalat niya na 2.7 na ang total fertility rate ngayon ng Pilipinas, at sinasabing babagsak sa 2.05 sa loob ng sampung taon.

Sa kasalukuyan, kasama ang Pilipinas sa 74 bansa na binibilang ng UN sa intermediate-level fertility group, o mga bansang may 2.1 hanggang 5 children per women. Kasama si Reagan D. Tan, at mula sa Manila Bulletin, Philippine Daily Inquirer at www.prolife.org.ph.

LEAVE A REPLY

This site uses Akismet to reduce spam. Learn how your comment data is processed.