BAGO PA man nagkaroon ang Varsitarian ng regular na seksiyong “Filipino,” naglalathala na ang naturang pahayagan ng mga mag-aaral ng “Pitak ng Wikang Pilipino,” isang bahagi na inilalaan noon para sa mga kontribusyon ng mga estudiyante ng Unibersidad.
Sa pagsisimula ng “Pitak ng Wikang Pilipino” noong 1947, tumayong tagapayo para sa seksiyon si Jose Villa Panganiban, isang lengguwista’t unang tagapangulo ng Departamento ng Filipino sa UST. Bagaman hanggang tatlong beses lamang ito lumabas sa isang taon, naging regular ang paglalathala ng mga akda sa seksiyon simula noong 1956 hanggang 1958 dahil sa pagiging aktibo ng “Pitak” sa Kapisanang Aklat, Diwa at Panitik (Kadipan), isang samahan ng mga guro at estudyante mula sa iba’t ibang pamantasan—UST, University of the Philippines, Far Eastern University, University of the East, Manuel Luis Quezon University, National University, at Arellano University—na nagsusulong gamitin ang wikang Pilipino sa mga akdang panitikan at akademiko.
Ilang sa mga nalathala sa “Pitak” ang mga nananalong akda ng mga Tomasino sa taunang patimpalak pampanitikan ng Kadipan. Gayundin, noong 1958, nagsimulang maglabas ang seksiyon ng mga pangulong tudling tungkol sa paggamit at ang pagmamahal sa sariling wika.
Nanguna rin ang “Pitak” sa pagsasagawa ng mala-piyestang pagdiriwang tuwing Buwan ng Wika, na noo’y tuwing huling linggo pa ng Setyembre.
Tomasino siya
Alam n’yo ba na isang Tomasino ang isa sa mga patuloy na nagsusulong sa pagtangkilik ng Pambansang Wika?
Si Fe Aldave-Yap, nagtapos ng kursong Bachelor of Science in Education noong 1956 at Doctor of Philosophy in English and Linguistics sa UST, ay isa sa mga kilalang lingguwista na walang tigil sa pagpapakadalubhasa sa wikang Filipino at pagpapalaganap at pagpapakilala nito hindi lamang sa bansa kundi sa iba pang panig ng mundo.
Ipinamalas ni Yap ang kaniyang pagiging tunay na alagad ng wika sa pamamagitan ng pagsusulat ng mga translation books, diksiyonaryo, linguistic maps, at mga saliksik na tumatalakay sa wikang Filipino. Kabilang sa mga librong kaniyang naisulat ay ang “Global Filipino Crossing Borders,” “The Tagalog Region: Lexicon of the Languages and Dialects” at “A Comparative Study of Philippine Lexicons.”
Noong 2008, hinirang si Yap bilang The Outstanding Thomasian Alumni, habang noong 2010 naman ay ginawaran siya ng Presidential Lingkod Bayan Award dahil sa kaniyang debosyong ipinamalas sa larangan ng paglilingkod sa publiko.
Nagsilbi rin si Yap bilang komisyoner at direktor-heneral ng Komisyon ng Wikang Filipino, pangulo ng Children’s Literature Association of the Philippines, Inc. at kolumnista ng Manila Times.
Sa kasalukuyan, si Yap ang kinikilalang pangalawang pangulo ng Panitik ng Kababaihan at pangulo ng UST Education Alumni Foundation, Inc. Jonelle V. Marcos
Tomasalitaan
Alimuom (PNG)—singaw na galing sa lupa pagkatapos umulan
Hal.: Amoy-alimuom ang kapaligiran kaya sumakit ang tiyan ni Maritoni.
Mga Sanggunian
Aldave-Yap, Fe. Lakbay sa Mundo ng Global Filipino. Taft Avenue, Manila, Philippines: De La Salle University Press, 2012.
(2008) Alejandro Roces. Retrieved July 29, 2013 from http://www.philstar.com/opinion/77715/fe-aldave-yap-outstanding-thomasian
