Sinubukan kong bilangin
ang puting buhok ni Mama
na mas dumami pa ngayon
kumpara noong nakaraang Pasko.
Ganoon siya palagi:
maraming tanong,
maraming sagot.
(Kadalasan higit pa sa sagot na hinihingi ko.)
Tumatandang madaldal
at laging nakangiti.
Tuwang-tuwa raw siya
na makita akong
hindi naka-uniporme
at hindi nagmamadali.
Sumigla ang mga mata niya
habang ipinagyayabang sa akin
ang mga inilutong handa—
spaghetti na umaapaw sa sauce,
fruit salad na hitik sa keso,
crispy pata na bawal sa kaniya.
Nanghihinayang,
sumenyas ng halik si Mama
bago ibinaba ang mahigit isang oras din na video call.
