Matapang kong nilakad ang kalye ng Dapitan.

Hindi na alam ng baga ano ang pagkakaiba

ng usok na nakasasakal sa hingang pagal.

Iisa na rin ang sigaw ng busina ng mga sasakyan

sa tawag ng mga nangangailangan ng tulong

paganahin ang kanilang kompyuter.

At ang basa sa karatula ng mga dyip?

Hindi na “LRT Tayuman” kundi “LRT Tayuan.”

Umilaw ng pula ang stop light.

Nalimutan ko na kung paano iangat

ang kaliwang binti upang maglakad.

Natakot na rin yata ang kanang binti

sa nakaambang panunuot ng mga ugat

pagkasakay sa LRT.

Nagpaalon na lang ako sa daluyong ng taong patawid

Dahil nakapara na pala ng dyip

ang anino ko sa kabilang kalye.

Jasper Emmanuel Y. Arcalas

READ
Pagbabalik-tanaw kay Sto. Domingo

LEAVE A REPLY

This site uses Akismet to reduce spam. Learn how your comment data is processed.