Tag: Agosto 22, 2014

HINDI na magpapaloko ang taumbayan sa mga pulitikong nais abusuhin ang kanilang kapangyarihan sa pamahalaan, patunay rito ang mga sunod-sunod na pagpo-protesta sa labas man o sa pamamagitan ng social media katulad ng Twitter at Facebook, dagdag pa ang pagsampa ng mga impeachment complaints laban kay Pangulong Benigno Aquino III.

Tatlo sa mga inihaing impeachment complaints laban kay Aquino ang may kaugnayan sa iregularidad ng Disbursement Acceleration Program (DAP) na idineklara ng Korte Suprema bilang “partially unconstitutional” kamakailan.

NOONG ika-18 ng Hunyo, nilagdaan ni Pangulong Aquino ang paglalagay ng grapikong babala sa mga pabalat ng sigarilyo sa Pilipinas, na sanhi ng humigit kumulang 87,000 na pagkamatay taon-taon dahil sa mga sakit na nakukuha sa paninigarilyo.

Sa ilalim ng Act to Effectively Instill Health Consciousness through Graphic Health Warnings on Tobacco Products o Republic Act 10643, kinakailangang ilalaan ng mga tagagawa ng sigarilyo ang 50 porsiyento ng pabalat para sa paglalagay ng mga nakaririmarim na larawan ng negatibong dulot ng paninigarilyo sa kalusugan.

SA DALAWA’T kalahating taon kong paninilbihan sa opisyal na pahayagan ng Unibersidad, isa ako sa laging nananabik sa mga magaganap na aksiyon sa UAAP basketball.

Marami na rin akong nakasalamuha at naging kaibigan sa loob ng press room. Masaya pero mahirap din dahil magkakakompitensiya pa rin kami pagdating sa trabaho.

Gayunpaman, patuloy kong iniisip kung ano ang halaga ng mga peryodista: sila ba ay naglilingkod at nagbibigay serbisyo sa madla o sila’y nagbabalatkayo lamang at inaabuso ang press ID para sa pansariling interes?

Kamakailan lamang, naglabas ang UAAP Press Corps ng isang liham para sa mga manunulat at fotograpo na iwasang makihiyaw o makisali sa mga manonood habang ginagampanan nila ang kanilang trabaho.

PINANGUNAHAN ng UST Department of Biological Sciences ang pananaliksik sa lawa ng Taal na may angking natatanging biodiversity.

Ang “Taal Biota Project,” sa pamumuno ni Thomas Edison de la Cruz ay naglalayong suriin ang ekolohiya, at biodiversity sa lawa ng nasabing bulkan.

Bukod sa pananaliksik, layunin ding tumulong ni Dela Cruz, tagapangulo ng UST Department of Biological Sciences, at ng iba pang kasapi sa proyekto sa pangangalaga ng lawa.

Sa kasalukuyan, maraming lumilitaw na mga problema sa lawa ng Taal tungkol sa ekolohiya nito sanhi ng polusyon, maling pamamaraan sa aquaculture, at iba pang mga kadahilanan na maaaring humantong sa pagkawala ng mga hindi pangkaraniwang organismo.

ISANG mas nagkakaisang Philippine Medical Association (PMA) ang hangad ng bagong halal nitong pangulo na isang Tomasino matapos maganap ang PMA Annual Convention sa lungsod ng Vigan, Ilocos Sur, noong ika-23 ng Mayo.

Si Maria Minerva Calimag, MD, Ph.D., isang propesor mula sa Faculty of Medicine and Surgery, ang ika-93 pangulo at ikapitong babaeng pangulo ng PMA.

Bukod sa mas nagkakaisang PMA, hangad din ni Calimag na ayusin ang pamamahala sa kanilang institusyon.

“Bilang isang organisasyon, nararapat lamang na bigyan natin ng [mas maayos na] sistema ang [ating] pamamalakad,” ani Calimag. “Magpapakalat kami ng mga makabuluhang impormasyon sa lahat ng antas at aayusin ang daloy ng trabaho sa loob [ng PMA].”

HINDI DAPAT gawing magarbo ang paghahanda para sa pagbisita ni Pope Francis sa bansa sa susunod na taon, ayon sa ilang miyembro ng kaparian.

Pormal na inanunsyo ng mga pinuno ng Simbahan sa bansa ang pagbisita ng Santo Papa sa Pilipinas sa ika-15 hanggang ika-19 ng Enero 2015, pagkatapos ng kanyang pagbisita sa Sri Lanka. Inaasahang tutungo ang Santo Papa sa Leyte upang bisitahin ang mga biktima ng bagyong “Yolanda” sa Tacloban at Palo.

Ayon kay P. Efren Rivera, O.P. propesor sa Fakultad ng Teolohiya sa Unibersidad, magiging iba sa nakasanayan ang pagbisita ni Pope Francis dahil ang layon ng Santo Papa ay ang makasama ang mga biktima ng bagyong “Yolanda.”

KATOTOHANAN ang magsisilbing susi upang makamit ng mga Katolikong Filipino ang biyaya ng makabagong ebanghelisasyon.

Ito ang panawagan ni Arsobispo Socrates Villegas, pangulo ng Catholic Bishops’ Conference of the Philippines (CBCP), sa libo-libong delegado ng kauna-unahang New Evangelization Conference (NEC) 2014 sa SMX Convention Hall, SM Mall of Asia, Pasay City noong ika-7 ng Hunyo.

Kinakailangan ng mga Katoliko na hanapin, ipahayag at gawin ang mga bagay nang naaayon sa katotohanan at kalooban ng Diyos, ani Villegas sa isang sulat na binasa ni Joseph Latorre ng Diyosesis ng Parañaque.

HINDI makakailang inasahan na ng marami ang pagkakahirang kay Ginoong Cirilo Bautista bilang Pambansang Alagad ng Sining para sa Panitikan. Isa siyang kilalang kritiko, batikang manunulat, at lubos na nirerespetong propesor ng Literatura—ngunit, kung iisa-isahin, ano nga ba ang mga natatanging ambag ng henyong minsan ding namalagi sa Unibersidad?

Sa isang espesyal na panayam kay Bautista sa kaniyang tahanan sa Lungsod Quezon, kinilala pang lalo ng Varsitarian ang nabubuhay na yaman ng salinlahing Filipino.

Ayon kay Bautista, para sa kanya, ang kanyang pinakamahalagang ambag sa panitikan ng bansa ay ang “musikang” nailalapat sa kanyang mga gawa na kinagigiliwan ng mga mambabasa.

TAHASANG tinutulan ng Unibersidad ang kautusan ng Commission on Higher Education (CHEd) na tanggalin ang Filipino sa kolehiyo bilang pakiki-ayon sa bagong curriculum ng K-12.

Bilang pagtugon sa kinakaharap na suliraning pangwika ng bansa hinggil sa pagtanggal ng Filipino sa kolehiyo, nakiisa ang Unibersidad sa pangunguna ng Department of Filipino sa pagdiriwang ng “Buwan ng Wikang Pambansa: Wika ng Pagkakaisa” sa pamamagitan ng pagdaos nito ng Saliksikan 2014 at Tanggol Wika noong ika-4 at ika-6 ng Agosto sa AMV College of Accountancy Multi-Purpose Hall.

NAGISING si Islaw sa biglaang pagbuhos ng malakas na ulan. Tumayo siya mula sa bangketng kaniyang hinihigaan sa tabi ng Unibersidad at sumilong sa harap ng Wakdolans… iyon ang naririnig niyang pangalan ng tindahan na ‘yon eh, tindahan ng mga masasarap na pagkain.

Hindi na iba ang ganitong umaga sa kaniya. Wala siyang permanenteng masisilungan kaya naman bata na lang niya tinutungo ang lugar kung saan siya makakatagpo ng kaalwahan.

Tila matatagalan sa pagdating noong araw na iyon ang kaniyang kalarong si Kat. Naantala siguro ang pagpunta nito dahil sa naging buhos ng malakas na ulan. Bertdey daw ng kaibigan nitong hindi naman niya kilala, ngunit dahil may ‘chibog,’ bibitbitin siya nito. Maliwanag ang usapan nila kagabi, ano kaya at hindi pa ito nagpapakita.