Tag: Agosto 31, 2009

NAGDULOT ng pagtatalo ang inilabas ng Komisyon sa Wikang Filipino na rebisyon ng “Alfabeto at Patnubay sa Ispeling ng Wikang Filipino” noong taong 2001 na nagsasabing “kung ano ang baybay ng salita, siya ring
sulat.” Ilang akademiko rin ang nagparatang sa komisyon na nagtutulak diumano’y pagwasak sa wikang pambansa sa halip na paunlarin ito.

Upang maiwasan ang ano pa mang kalituhan sa tamang pagbababaybay at pagsulat ng wikang Filipino, maglalabas ang komisyon ng “Gabay sa Ortograpiya ng Wikang Pambansa.” Binalangkas ito ni Ricardo Ma. Nolasco, dating tagapangulo ng komisyon, at inaprubahan naman ng nakaraang taon.

“Ang marami dito ay dati ng mga kaalaman at tuntunin na naipahayag, naimungkahi o naiharap na sa nakaraan, subalit sa ‘di malamang dahilan ay naiwaksi at nakalimutan. Sa ganang amin, ang muling pagpapahayag ng mga subok na at nakagawian nang tuntunin ay hindi masama kundi mabuting bagay,” ayon sa komisyon.

PINATATAPOS na ng administrasyon ng UST ang lahat ng trabaho ng Publishing House sa UST Printing Press na pinangangambahang magsasara bago matapos ang taon.

Isang empleyadong mahigit dalawang dekada nang nagtatrabaho dito ang nagsabi sa Varsitarian na bagaman wala pang opisyal na abiso ng pagsasara, tila doon na rin papunta ang utos sa Printing Press na tapusin ang lahat ng trabaho hanggang katapusan ng Agosto.

“Nagtanong kami kung bakit hindi na tatanggap ng bagong trabaho at humihingi kami ng meeting, pero hindi nila kami sinasagot,” ani ng empleyadong humiling na huwag pangalanan.

Ayon naman kay John Jack Wigley, dating officer-in-charge ng Publishing House, bali-balita na ang pagsasara ng imprenta.

“I heard the news just this semester,” ani Wigley na kamakailan lamang ay tumangging pahabain ang kaniyang termino sa Publishing House.

ISANG Tomasino ang kabilang sa kontrobersiyal na listahan ng pitong bagong Pambansang Alagad ng Sining na itinalaga ng Pangulong Gloria Macapagal-Arroyo.

Si Francisco “Bobby” Mañosa na nagtapos ng Architecture sa UST noong 1953 ay ang ika-apat na Tomasinong Pambansang Alagad ng Sining sa Arkitektura. Ngunit kasabay nang pagbubunyi, nabahiran ng politika ang parangal.

Kinukuwestiyon ngayon ng ilang National Artists ang proklamasyon ng apat sa pitong bagong ginawaran ng parangal na sina Mañosa; Jose “Pitoy” Moreno sa Fashion Design; Cecile Guidote-Alvarez (Teatro); at Carlo Caparas (Visual Arts). Anila, hindi kasama sa orihinal na listahan ng mga nominado ng National Commission on Culture and the Arts (NCCA) na isinumite kay Mrs. Arroyo ang apat.

NAMAYAGPAG ang mga Tomasino sa katatapos lamang na licensure examinations para sa Architecture, Nutrition and Dietetics, Occupational Therapy, Physical Therapy, Nursing, at Medicine.

Sina Ramil Tibayan ng Architecture, Paola Suarez ng Nutrition-Dietetics, at Melissa Paulita Mariano ng Medicine ang tatlong bagong topnotcher ng UST na nagtala ng 84.10, 89.95, at 88.17 porsyentong grado.

Sa 12 pumasok sa Top 10 ng Medicine, anim ang nanggaling sa UST. Ito ay sina Mariano, Erick Mendoza na may 88 porsyentong grado; Katrina Mae Gamponia (87.67 porsyento); Joseph Villanueva (87.17 porsyento); Ricky Hipolito (87.08 porsyento); at Hebert Manaois (86.92 porsyento).

Dalawampu’t anim na Tomasino naman ang nakapasok sa ika-lima hanggang ika-10 puwesto sa Top 10 ng Nursing board exam.

Wala mang topnotcher ngayon, ikinatuwa ni Glenda Vargas, dekana ng Nursing, ang resulta ng eksamen.

SI ROBERTO Abad, dekano ng Faculty of Civil Law, ang kumumpleto sa 15 mahistrado ng Korte Suprema, matapos siyang italaga ng Pangulong Gloria Macapagal-Arroyo noong Agosto 7.

Siya ang pumalit kay Associate Justice Dante Tinga na nagretiro noong Mayo 11.

Si Abad ang ika-apat na Tomasinong naka-upo ngayon sa kataas-taasang hukuman matapos maitalaga doon sina Diosdado Peralta, isang propesor sa Civil Law, at Luis Bersamin noong Pebrero at Abril.

Si Bersamin ay nagturo sa Civil Law habang si Associate Justice Renato Corona naman ay kumuha ng kaniyang Doctor of Laws sa UST.

Ayon kay Abad, dati na siyang nasabihan ni Chief Justice Reynato Puno na sapat na ang  kaniyang katungkulan bilang acting dean para magsilbi sa Korte Suprema.

INIAKYAT na sa kasong reckless imprudence resulting in homicide ang kaso laban sa isang estudyante ng Medical Technology matapos pumanaw ang kaniyang nasagasaan na jogger.

Namatay si Teresita Escaler, 61, sa cardiovascular unit ng UST Hospital sanhi ng acute subdural hematoma noong Hulyo 22.

Kapwa nabundol ng asul na Toyota Vios ni Jonathan Estaris sina Escaler at Ceferina Holgado noong Hulyo 3 habang sila ay naglalakad papuntang Santisimo Rosario Chapel. Nakaligtas si Holgado matapos magtamo ng head laceratorions at hematoma, samantalang 18 araw namang malubha ang kalagayan ni Escaller sa ospital.

Inilibing si Escaller sa Los Baños, Laguna noong Hulyo 26.

Samantala, wala pang tiyak na petsa ang arraignment sa kaso matapos itong makansela noong Agosto 23, isang non-working holiday.

Ayon kay Rolete Ongcal, panganay na anak ni Escaller, umabot sa mahigit na P1 milyon ang binayaran nila sa ospital.

SUPORTADO ng mga Tomasino ang iba’t ibang programa para sa isang malinis na halalan sa 2010.

Mahigit 200 ang nagpasiyang maging “bantay ng bayan” o patroller sa darating na eleksyon matapos ilunsad ng ABS-CBN ang pagpapatala para sa “Boto Mo I-Patrol Mo” noong Agosto 18 sa UST Gym. Mabibigyan ang isang patroller ng pagkakataon na maisumbong diretso sa ABS-CBN ang mga anomalya sa kanilang komunidad hinggil sa nalalapit na eleksyon.

“BINUHAY” ng Unibersidad ang Department of History na posibleng magbigay-daan sa mga bagong programang pang-akademiko sa Unibersidad.

Pinamumunuan ni Prop. Augusto de Viana ng Graduate School, ang departamento ang nagsisilbing simula ng vertical articulation sa UST kung saan ang mga propesor sa bawat kolehiyo mula sa iisang disiplina ay kabilang sa isang departmento.

“Sa totoo lamang, dati nang mayroong Department of History at ngayon, ito ay muling binubuhay sa maraming kadahilanan,” ani De Viana.   “Mayaman sa kasaysayan ang ating Unibersidad kung kaya’t nararapat lamang na magkaroon tayo ng isang kagawaran para rito.”

Unang itinatag noong 1967, ang noo’y Institute of History ay nilikha upang hubugin ang kakayahan ng mga propesor ng Unibersidad sa kasaysayan. Walang nakakaalam kung bakit ito nabuwag noong dekada ‘80.

DUMALAW ang halos 20 delegado ng Federation of Asian Bishops’ Conferences (FABC) sa UST bilang bahagi ng kanilang ika-siyam na pagpupulong na may temang “Living the Eucharistic Mystery.”

Bumista ang mga obispo, kasama ang mga madre mula sa Vietnam, Taiwan, at India, sa mahigit 10 parokya sa Pilipinas, kabilang ang Santisimo Rosario sa UST. Kasabay ng kapistahan ng Our Lady of the Assumption, idinaos ni Arsobispo Albert D’souza ng Agra, India ang isang misa sa UST.

Sinamahan siya nina Arsobispo Ignatius Suharyo Hardioatmodio ng Semarang, Indonesia; Obispo Athanasius Schneider, ang auxiliary bishop ng Karaganda, Kazakhstan; Obispo Nicholas Mang Thang ng Hakha, Myanmar; Obispo Carlito J. Cenzon, CICM, Obispo ng Baguio; Obispo Peter Nguyen Van Kham auxiliary bishop ng Ho Chi Minh, Vietnam; P. Franz-Josef Eilers SVD, executive secretary ng Office of Education and Faith Formation, at ni vice rector Pablo Tiong, O.P. ng UST.

SA LOOB lamang ng isang linggo, dalawang kaso ng pagnanakaw ang naitala ng pulisya sa tulong ng UST security office noong Agosto 11 at 18 sa Kalye Lacson.

Dalawang menor de edad na lalaki ang inaresto ng awtoridad nang maiulat na nanghablot ang mga ito ng isang kwintas na ginto sa labas ng kampus noong Agosto 11. Nahuli ang mga batang suspek na edad 13 at 14 ng isang roaming guard ng UST sa tulong ng isang sidewalk vendor na nakasaksi sa krimen.

Sa interogasyon ng pulis, umamin ang dalawa na kasapi sila ng isang grupo ng kabataang nagnanakaw sa Kalye España at Quiapo. Ngunit itinanggi nila na pinamumunuan sila ng sindikato.

“Naging trabaho na po namin ito pero ‘di po ito alam ng aming mga magulang,” ani ng 13 anyos na bata.

Dinala ng awtoridad ang mga bata sa University Belt Area (UBA) Police Station na siyang nagdala sa mga bata sa Department of Social Welfare and Development.